美食在羅馬
行街行到攰,粗眉仔和豬豬便決定去羅馬一間當地名店食甜品。
晚上的共和國廣場格外漂亮,古羅馬建築經過打燈之後恍如一個個上演歷史劇的舞台,相信置身其中,大多數遊客都會深深感受到羅馬帝國昔日的輝煌,粗眉仔是其中一個。
這間甜品名店的位置雖然十分偏僻,但仍然有好多人慕名而來,雖然已經是晚上九點多,店外仍有很多人在排隊。
兩人點了提拉米蘇,口感非常綿滑,甜度適中,奶味香濃,忌廉黏舌頭上慢慢溶化,讓味蕾充分感受到其美味,快活過神仙。
因為見人人都點忌廉餅乾,兩人好奇下也要了兩塊餅乾,分別是原味和朱古力味。
餅乾鬆化香脆,同綿滑的忌廉成一大對比,但兩者一同咀嚼就非常夾,好食到暈。
事後會否令膽固醇升高,粗眉仔不知道而且亦沒有深究,不過非常肯定的是,食完後兩個人都冇覺得頂胃和甜膩。
Come il Latte
地址:Via Silvio Spaventa 26, 00187, Rome Italy
甜品店附近有一個叫做「Dell'Acqua Felice Fountain」的噴泉,雕刻精美而簡潔,雖然是幾百年前的古蹟,但可能保養得宜,看起來甚新淨。
夜晚的共和國廣場燈光璀璨,但地上有不少垃圾,頗為煞風景。
在酒店休息一會後,兩人便出去食宵夜,可能因為比較夜,餐廳內冇人,但是應仍然非常熱情。
意粉大大盤,配料不多,感覺有少少寒酸,不過仍算是好味。
烤雜扒非常大份,調味簡單,火候剛剛好,不過肉味不算濃郁。
烤雜菜的煮法頗為普通,但蔬菜十分新鮮,食落鮮味。
餐廳食物的份量可以用大份抵食來形容,味道亦算不錯,合格有餘但未到「冇得頂」的程度,粗眉仔真的好懷念翡冷翠的餐廳。
Restorante Zeus
地址:Via Nazionale, 251/A, Rome
電話:0648905444
網頁:http://www.ristorantezeus.com
微弱的街燈照著兩個寂寞的夜歸人,明天就要離開意大利了,粗眉仔覺得有點依依不捨……