新宿，老街
講到新宿，歌舞伎町大家可能去得多，但在JR新宿站西口旁邊的思出橫丁（回憶的橫街）大家又去過未？講起這條橫街可算係大有來頭，皆因大名鼎鼎的美國時代雜誌（Times）曾將佢選為「2004亞州最佳」（Asian Best）。
有乜咁巴閉？老實講，食物唔算係特別好食（大多是串燒店，不算特色），也沒有甚麼靚景，有的只是再多錢也「打做」不出的舊日情懷，和絲絲任何先進機器也代替不到的人情味道。
另外，這條橫街在以前曾是東京上班族的「蒲」點，但日本的經濟每況愈下，到此幫襯的人越來越少，也許不久將來這條街會完全消失也說不定，單是這一點，就已經夠值得到此一遊。
小註：其實我地香港都唔輸蝕，鵝頸橋底的打小人亦曾被時代雜誌選做「2008亞州最佳」，不過好似唔係太多香港人知。
由於新宿有太多美食，粗眉仔和公主都不想這麼快便耗盡「彈藥」(胃口)，決定行到邊食到邊。兩人先到就近的迴轉壽司店開開胃，所有壽司一律105日元，即不用港幣10元，但已好食過甚麼「板X」和「元X」的二三十元貨色。
兩人行到新宿二丁目時，又買了雜誌介紹過的炸咖喱包，外脆內軟，咖喱香濃，果然好食。
新宿三丁目花園神社旁邊有間叫無敵家的麵店，無敵家在池袋非常出名，很多港台旅客亦慕名而來，搞到大排長龍，但這間位於新宿的分店卻「同店唔同命」，居然連一個客都冇，但公主見餐牌跟池袋的一模一樣，便硬拖著粗眉仔入去。
經公主介紹，點了兩碗「豪快」(中文解做豪華麵)，每碗950日元，非常大碗兼有八種口味，當中叉燒屬上上之選，入口即化，係粗眉仔食過咁多日式叉燒中最好的。
公主食過池袋無敵家，且出名嘴刁，但都話兩間冇分別，一樣咁好食，但人性天生就是好爭，係都要排一下隊先覺得好食。如果大家唔想排隊又想食靚拉麵，不妨諗諗新宿無敵家。特別一提，粗眉仔入去冇幾耐，店舖立即多了五六個客人，掌櫃的當堂識笑。
花園神社有學生在悶彈結他，有中年人在借酒消愁，有流浪漢在準備被鋪…該沒有一本講東京的旅遊書會提這些「景點」吧。
夜深的新宿，除了比日間多了垃圾，還多了不少無家可歸的人。
早餐於新宿歌舞伎町的松屋（Mazuya）。
粗眉仔日本旅遊小貼士
松屋係日本知名的連鎖快餐店，其地位等如我們的「大X樂」，「梗有一間在左近」兼且價廉物美，係個人遊恩物。粗眉仔個人認為，松屋的牛肉飯甚至比「吉X家」的好味。無乜「盤川」的朋可以在這裏醫肚，600日元已經可以食到好飽。
旅程開始 |