壽司小鳥燒
酒店對面有一間小小的迴轉壽司店，粗眉仔幾年前來東京時已經幫襯過一次，一直都念念不忘，想不到仍然「健在」。
這間壽司店賣的是時令海鮮，餐牌隨季節而轉變，今次就有原隻大赤貝，肉質爽口彈牙，鮮甜美味。
不過最引死人的還是時令拖羅，700円有四大件，魚肉勁厚，剩係睇色水就已經知道係超新鮮。
顏色靚，味道亦冇令粗眉仔失望，塊塊魚肉都入口即融而且油潤鮮甜，兩人總共KO了三份。
小菜亦十分出色，譬如這碗用清湯煮的竹筍就清新可口。
令粗眉仔留下印象的，還有這種不知名的甚麼貝，在香港從未見過，但亦非常鮮甜。
同上次來時一樣，這間壽司店的食物超級新鮮，價格亦非常合理，真不想在香港食日本菜。
櫻壽司
地址：日本東京都新宿區歌舞伎町一丁目25-3地下
電話：+81 3-3204-4240
特別一提，餐廳內所有員工都係公公婆婆，可這間餐廳卻營業到深夜，真是辛苦他們了。
可能撞正放工時間，新宿到處都多人到爆炸，同輕井澤完全係兩個世界。
歌舞伎町入口旁邊有一間驚安之殿堂，不但貨品多到爆炸，顧客亦多到爆炸，兩人待了大概五分鐘就頂唔順，什麼都沒買就出去了。
中國人其實最愛日本，而且有越愛越烈的跡象，幾乎每一間鋪頭都有至少一個會講國語的店員。
行街行到攰，兩人打算食串燒，而每次來日本食串燒都只幫襯某間連鎖店。
想不到酒店對面有其中一間分店，正正就在櫻壽司樓上。
這間串燒店非常旺，好在兩人一去到便有位，不用等。
科技進步，顧客可以用電腦平板點餐，菜單含中英日多種語言，極為方便。
手羽先同燒雞是必點的，而且最好是鹽燒，貪其原汁原味。
串燒內臟也不錯，尤其係雞心，爽口鮮味，粗眉仔足足食了四串。
不過今餐最好食的，是這一款「期間限定」的鹽燒新鮮海蝦，不算大隻，但鮮甜多汁，好食到唔停得口。
食燒烤最重要係火候，這鹽燒新鮮海蝦就是最佳示範，連蝦殼都燒到脆卜卜，可以由蝦頭食到落蝦腳。
鳥貴族西武新宿駅前店
地址：日本東京都新宿區歌舞伎町一丁目25-3四樓
電話：+81 3-6302-1944
網站：torikizoku.co.jp
提提大家，這家店下晝五點鐘開檔，營業至凌晨五點，絕對係食宵夜的好去處。
餐廳食材標榜百分百日本國產，唔知點解，「國產」這兩個字，有些國家講就會令人放心，但有些國家會令人心驚。
明天就要返香港，諗起香港的所謂「美食」，粗眉仔就有股衝動，想立即走去富士山吊頸……
