孟加拉之西
今年農曆新年（不是甚麼「春節」），放兩日年假就可以自製十日連假，粗眉仔自然玩到盡，星期五收工就直接去機場搭夜機。由於係從寫字樓出發，所以粗眉仔乘搭上次去不丹時坐過的機場巴士，但未去到青衣就已經爆滿，而且成車人都講普通話，後來發現車上九成人都不是在機場落車，而係去港珠澳……香港陸沉，都係多得這班「高質旅客」。
今晚由香港機場前往外國旅遊的人極多，梗係啦！攞兩日自己假就可以有十日連假喎。
飛機上幾乎全部都是印度人，黃種人白種人加起來還不到十個。
因為直航，四個多小時便到加爾各答，減去時差，到埗時是印度時間十一時多。
可能太夜，入境部門個個職員都冇乜精神，手腳慢吞吞，兩人等了好久才入到境。
誰知過了入了境後仍得等，因為行李仍然未搞掂。
遊客甚少，兩人一過海關，就見到旅行社派來接待兩人的奄滅（Amit），因為「滅」字不大吉利，粗眉仔決定叫他做奄列。
這時候粗眉仔才知道，原來印度政府因為國防理由，大概一年前開始就禁止本地電訊商向外國人出售上網電話卡，所以接下來九天粗眉仔都只能在酒店才能用Wi-Fi上網了。
不過可能整定，出發前豬豬有個外國朋友送了一張可以在印度上網電話卡，雖然速度不快，但總好過冇。
深夜的交通甚為暢順，奄列說四十分鐘左右便可以返到酒店，兩人攰到冇命，只想盡快休息。
粗眉仔在加爾各答的第一個節目，竟然係撞車！
不幸中之大幸，架車只係撞凹少少，冇人受傷，但係就要等另一架車來接，粗眉仔好鬼眼瞓，幾時先返到酒店？
再諗真，如果撞的角度再偏一些，後果不堪設想。
大概二十分鐘後，奄列就召來另一架車，在這個時間這個地點，算是非常有效率了。
雖然加爾各答曾是英屬印度的首都，但市容甚為殘破，印度人宗教已經可以當飯食，不大注重塵世的基建。
