印度神藥
一個半鐘頭後，飛機抵達加爾各答，空氣仍然差到冇朋友，呼吸時直頭覺得有一陣酸味。
一出機場就看見奄烈，今次也是由他負責接送。
粗眉仔發現，加爾各答的街道十分乾淨整齊，估計是因為英國人曾規劃過吧。
加爾各答市區非常塞車，粗眉仔小睡片刻後，車子仍在路上。
原來前面發生交通意外，不過道路實在太塞，連救護車都冇乎，傷者自己步行去醫院可能更快。
今晚的住處是一個禮拜前住過的酒店，但今日到埗時間比較早，可以享用晚餐。
房間比上次住的稍大，而且有窗。
粗眉仔和豬豬原本心情好好的，點菜時卻搞到一肚氣。
侍應最初同兩人講，話淨係可以點餐牌上的中國菜，等到點好菜，又話淨係可以點印度菜，但係又推介兩人食炒麵……嚇！乜炒麵唔係中國菜咩？
青檸汁是鮮榨，清新好飲，不過太細杯。
黃咖喱魚稍辣，但魚肉鮮甜。
雞肉配綠色的旁遮普汁（Punjab sauce），口感清新，令人回味無窮。
平心而論，餐廳的食物質素不錯，但服務就認真麻麻，宜多加改善。
兩人飯後閒著無聊，便出去行街街，一出酒店便見對面有間藥房。
豬豬買了樽咳藥水和一排抗生素，價錢平到你唔信，只需要港幣二十大元！
粗眉仔不期然想起《我不是藥神》這套大陸電影，在電影中，主角要去印度偷運西藥返中國……
除了藥房之外，酒店周圍沒有其他值得看的店鋪，而且粗眉仔亦開始有點不舒服，兩人決定返酒店早早休息。
