曼谷識食
從萬象搭飛機去曼谷途中，已經在想：曼谷的雨究竟落完未？
一如所料，泰國上空的雨雲極厚，受天氣影響，飛機搖擺得頗厲害。
幸好臨近曼谷時，太陽再次展露歡顏，雨後陽光果然很美。
泰國機場比上年來時企理得多，而且看似完成，跟舊年的「裝修中狀態」分別甚大，英祿(泰國總理)上臺後，泰國政局似乎穩定了。一講目的地，司機便一臉不情願，說：「那裏好塞車的。」
司機講得冇錯，的士足足塞了一個鐘九個字才到酒店，換上平日交通暢順時，不用一個鐘頭就到了。順帶一提，司機不但態度惡劣，而且極度貪心，想不找錢就絕塵而去，粗眉仔對曼谷的好感登時大打折扣。
放好行李出去吃晚飯時，竟然落大雨，兩人行到半路，無遮無檔，慘成落湯雞。惡運繼纏身，兩人上的士後才發覺唔夠泰銖，又落車徒步去就近BTS站的ATM提款。風雨中，兩人坐篤篤去到Somboon，雖然上次已經去過，但食過返尋味，再吃一次。
餐廳行將打烊，很多東西都賣乾賣淨，或索性不煮。
咖喱蟹。這裏的招牌菜，但第二次食已無驚喜，還發現不少缺點，當中最大一個是油膩。
蝦冬陰。最普通的反而最好味，食完老撾的清淡冬陰，覺得泰國的好惹味、好刺激…
炒通菜。普通冇特別。
蒸鱸魚。勁大條，由眼珠判斷，這鱸魚頗新鮮，火候剛好，但衰在好做唔做，碟下有明火「煲」住，條魚越食越爛，且辣椒過多，浪費了一條好魚。
可能趕住收工，食物水準比上次差了些，但尚算抵食，雖然如此，粗眉仔不打算再幫襯了。
素可泰酒店
粗眉仔住的酒店，包一餐下午茶，由於享用那天是星期六，所以有朱古力做主題。
用下午茶的餐廳以走廊分成兩個室，一邊係「主菜」(Main Course)，另一邊是「甜品」(Dessert)。
餐廳地方大，環境十分舒適，檯與檯保持適當距離，無絲毫侷促之感。
雖只是下午茶，但選擇不少，單是肉批已有好幾款，比香港不少自助午餐還要豐富。
主菜有壽司供應，雖非即叫即製，但味道不錯，比超級市場賣的好N倍。
粗眉仔去年已覺泰國哈日，今次更甚，因見主菜檯上有不少日本食物。
食完主菜已飽了七分，沒想到原來甜品更精彩，雖然都是朱古力，但形態多樣，最得意是紅酒朱古力腸，食幾多自己切幾多，似真的在食腸一樣。
話雖如此，有幾款甜品卻好睇唔好食，如其中一款蛋糕，就甜到阿媽都唔認得。
既是朱古力宴，又怎少得朱古力奶？這裏的朱古力奶是自己煲的，先揀選不同可可濃度的朱古力片，再放入煲內煮熔。粗眉仔太飽了，只拿了一塊朱古力片吃，發覺竟比甜品好食。
奉勸大家，如有機會到這裏吃下午茶，記住之前不要吃午餐，否則一定後悔。
旅程開始 |