富士急遊樂場

酒店專車將粗眉仔一行六人送到河口湖火車站，再乘富士急公司專用火車（Thomas 呀！好得人驚！），一個站後便到富士急遊樂場。

遊樂場有四個出名遊戲，第１個係經典超高超長過山車…

第２個係入了健力士號稱最多次旋轉的「蜘蛛型」過山車…

第３個係企定定衝刺的極速過山車…

第４個係鬼屋。由於時間所限，粗眉仔只玩了其中兩個。

「蜘蛛型」過山車

由於貪就腳，粗眉仔一行人第一個遊戲就走去排，點知兩個鐘頭後至有得玩…
這過山車太變態啦！雙腳離地不特止，仲要垂直俯衝再加埋倒轉再倒轉，刺激度爆燈！
刺激度：激激激激激(以五個激為最高)

經典過山車

一上斜，坐後面兩個日本妹就嘈之巴閉，搞到粗眉仔都驚埋，上到七十米終於收聲(可能已失去知覺)，到衝斜時又嗌過，好識搞氣氛。
過山車又長(耐)又刺激，非常好玩。*另外五人已進入假死狀態。
刺激度：激激激激

由於粗眉仔買了Free Pass(價值4800日圓)，為了回本(之前兩個遊戲加埋只值2000日圓)，只好狂玩其他不用排隊但比較不刺激的遊戲。但最主要原因，就是除粗眉仔外其餘五人的心臟都到達極限，不能再承受更多驚嚇。

滑浪飛船

海洋公園都有得玩，但這個更濕。
刺激度：激激激

哈呣太郎單軌車

超低智，大人坐完要預左俾人笑。
刺激度：激

瘋狂老鼠過山車

舊年天馬艦都有得玩，得個痛字，唔好玩。
刺激度：激

激流碰碰船

一個字：濕。
刺激度：激

幸福摩天輪

為睇富士山而坐，毫不刺激，但女伴都驚到面無人色，搞到粗眉仔都驚埋。(驚佢嘔冇定匿…)
刺激度：激激

鬼太郎恐怖屋

趣味多過驚嚇，但三位女士仍然嚇到呱呱叫，營造恐怖氣氛。
刺激度：激激

太空侵略者

一片漆黑的過山車，但加入了射擊元素，玩者可邊坐邊打怪獸，幾好玩！最後埋單計分，擅長打機的粗眉仔只得十五分，而身邊機械白痴的女伴卻竟有七十五分，認真冇天理…
刺激度：激激激

在巴士站附近，見到漂亮的富士山，個個都興奮到嘩嘩聲。

晚上六時三十分，平安回到新宿。