豪飲豪食
睡到日上三竿，享用完酒店的泳池後，粗眉仔才施施然到附近的shopping mall閒蕩。
曼谷最新最潮的shopping mall都集中在BTS的Siam及National Stadium兩站。(四面佛那邊自Sogo大火後已被癈了武功…)
曼谷的商場間間巨無霸，認真行的話一個禮拜都唔夠，但粗眉仔最愛還是近National Stadium站的MBK，因貪佢夠local，且東西平靚正是也。
行完街便坐的土到河畔的文華東方（Madarin Oriental）享用超豪自助 Lunch加Tea（1345至1545）。
酒店頗殘舊，但裝修典雅有氣派，有種內歛的貴氣。
呢度人人都斯斯文文，搞到粗眉仔都「上等」起來，雖然美食當前，亦不敢造次。
呢度每一樣食物都貴精不貴多，每碟都不會超過10件，寧可密密添，密密煮，保持食物質素。間中會見西人廚師出來試食，非常認真。高級食物如龍蝦、生蠔、鵝肝…要幾多有幾多，冇人同你爭。
粗眉仔聽過，真正靚蠔應有新鮮海水味，這次還是第一次在自助餐中食到，甚麼都不落已是鮮味無窮。
連肉都分牛、羊、豬、鹿，可惜粗眉仔只夠力試牛同鹿。
文華最耍家的甜品。媽呀！怎麼粗眉仔生下來只有一個胃呢？
粗眉仔曼谷旅遊小貼士
雖然「上等」，但穿牛仔褲波鞋之類的casual wear已可，切勿穿短褲涼鞋，因隨時會被禁止進入。
酒店附近係曼谷舊區，有很多英式建築，影相勝地。
行回Silom區已是身水身汗（約20分鐘），於是去了家以往去開的泰式按摩加水療中心歇歇。Silom 區有多家泰式按摩，1小時300至500泰銖左右。按完摩又行完街，較早前的鵝肝仍未落格，晚上原打算到Blue Elephant試泰國皇家菜的計劃只好取消，放佢飛機，哈哈哈！哈哈哈…
食慾低落的狀態下走到同Silom交界的一間茶餐廳模樣的泰式食店，想不到會有意外驚喜。
Pandan 葉炸雞，這塊葉不只是裝飾，還會將本身香味滲透到雞肉上，呢種Pandan葉在東南亞是烹飪常客，菲律賓同印尼都用此來增加食物香味。
蟹肉蟹羔炒的Pad Thai奄烈，非常好味。
再加一碟炒通菜，三味菜連兩杯凍飲加埋一百蚊港紙唔駛，抵食到庳。經過三日的吃喝玩樂，粗眉仔到第四天已有心無力，只得拖著擬似懷孕三個月的大肚腩躺在酒店泳池旁邊等候…上機返香港。
旅程結束 |