街檔街食
在酒店享用完早餐同泳池後，十二點左右乘BTS在Mo Chit站落車，便到著名的Chatuchak（摘刀摘）市集。
以前Chatuchak只開星期日（粗眉仔十年前去時只開星期日，仲只限下晝，且冇而家咁墟陷），但可能現在遊客越來越多，所以連星期六都開檔。
特別推介：
玻璃店—全部獨家製作的玻璃器皿，花紋獨一無二，每次來「摘刀摘」都會買番幾件。
藤具店—選擇多，款式好，價錢平。
家居擺設—不算平，但勝在夠獨特。
粗眉仔曼谷旅遊小貼士
（1）無論好天落雨都記住要帶遮，有太陽曬住同冇太陽曬住真係差幾度，冇帶遮露天行都咪話唔甘。
（2）買野記住要講價。
Chatuchak 內食肆眾多，午餐絕對不成問題，但由於食物比較地道，所以點的時候要小心，就好似粗眉仔懶醒叫了芒果沙律和木瓜沙律，原來這裏用的「芒果」和「木瓜」都是未熟透的，泰國人興將之刨絲當菜食，再加酸辣汁或其他配料便成為沙律。行到周身滾再食辣爆沙律，都咪話唔甘…
買完野仲可以在就近公園草地曬太陽，有竹蓆出租。
返酒店休息過後，便坐的士到Silom附近的Lumpini公園旁邊的Suan Lum Night Bazzar（雙林夜市）。
跟Chatuchak一樣，Suan Lum都位處公園旁邊，但後者卻比前者冷清得多，去這麼多次這次算係最少人了。
邊垂的大排檔也是冷冷清清，但仍維持水準，炒飯同泰式炒米令人回味無窮，可能禽流感關係，冇粗眉仔最愛的泰式海南雞飯。
Suan Lum賣的東西比Chatuchat高檔，但欠驚喜，且議價空間有限，選擇亦不多，去過Chatuchat的話可以逛逛就算。
市場正中也有一個大排檔，有Band伴奏，西人較多，食物較貴且較「行」。
粗眉仔提提你，不想坐的士，Suan Lum附近有地鐵，再行遠些可坐BTS（Sala Daeng站）。